Kerala Govt Onam Gift
സർക്കാർ ജീവനക്കാർക്ക് ഓണസമ്മാനം: ബോണസിനൊപ്പം 7 മാസത്തെ ഡി.എ കുടിശികയും പണമായി ലഭിച്ചേക്കും!
തിരുവനന്തപുരം: വരുന്ന ഓണക്കാലം സംസ്ഥാനത്തെ സർക്കാർ ജീവനക്കാർക്കും പെൻഷൻകാർക്കും ഇരട്ടി മധുരമുള്ളതാക്കാൻ സർക്കാരിന്റെ വൻ നീക്കം. ബോണസിനും ഉത്സവ ബത്തയ്ക്കുമൊപ്പം ജനുവരി മുതൽ കുടിശികയായ 2% ക്ഷാമബത്ത (DA) പണമായി നൽകാനാണ് ധനവകുപ്പ് ആലോചിക്കുന്നത്. പെൻഷൻകാർക്ക് ഇതിന് തത്തുല്യമായ ഡി.ആറും (DR) ലഭിക്കും.
ഈ വർഷം ജനുവരി മുതലുള്ള മുൻകാല പ്രാബല്യത്തോടെ 7 മാസത്തെ കുടിശിക ഒന്നായി നൽകാനാണ് സർക്കാർ ലക്ഷ്യമിടുന്നത്.
ഡി.എ 37 ശതമാനത്തിലേക്ക്; അധിക ബാധ്യത 684 കോടി
- നിലവിലെ ഡി.എ: 35%
- പുതിയ വർദ്ധനവ്: 2% കൂടി ചേരുമ്പോൾ ആകെ ഡി.എ 37% ആയി ഉയരും.
- പ്രതിമാസ ബാധ്യത: ജീവനക്കാരുടെ ഡി.എയ്ക്കായി 54.20 കോടിയും പെൻഷൻകാരുടെ ഡി.ആറിനായി 38.60 കോടിയും ഉൾപ്പെടെ പ്രതിമാസം 97.80 കോടി രൂപയുടെ അധികച്ചെലവുണ്ടാകും.
- ആകെ കുടിശിക: ഓണക്കാലത്ത് 7 മാസത്തെ കുടിശിക വിതരണം ചെയ്യുന്നതിനായി സർക്കാർ 684.60 കോടി രൂപ കണ്ടെത്തേണ്ടി വരും.
ഒരു ഇടവേളയ്ക്ക് ശേഷമുള്ള മുൻകാല പ്രാബല്യം
രണ്ടാം പിണറായി സർക്കാർ ജീവനക്കാരുടെ ക്ഷാമബത്തയ്ക്ക് മുൻകാല പ്രാബല്യം നൽകിയിരുന്നില്ല. 2019-ൽ നടപ്പാക്കേണ്ടിയിരുന്ന ശമ്പള പരിഷ്കരണം 2021-ൽ നടപ്പാക്കിയപ്പോൾ 7% ഡി.എ ലയിപ്പിക്കുകയായിരുന്നു. 2025 ജൂലൈ വരെയുള്ള ഡി.എ ഈ വർഷമാദ്യം അനുവദിച്ചെങ്കിലും കുടിശിക തുക നൽകിയിരുന്നില്ല. അതിനാണ് ഇപ്പോൾ പരിഹാരമാകുന്നത്.
വർഷാവസാനത്തോടെ ഡി.എ 40 ശതമാനത്തിലെത്താം!
കേന്ദ്ര സർക്കാർ ഈ മാസം അവസാനത്തോടെ 3% ക്ഷാമബത്ത കൂടി പ്രഖ്യാപിക്കാൻ സാധ്യതയുണ്ട്. ഇതും കൂടി നിലവിൽ വരുന്നതോടെ ഈ വർഷം അവസാനത്തോടെ സംസ്ഥാന ജീവനക്കാരുടെ ഡി.എ 40% ആയി കുതിച്ചുയരും. ശമ്പള പരിഷ്കരണം നീണ്ടുപോകുന്ന സാഹചര്യത്തിൽ, സംസ്ഥാന ജീവനക്കാരുടെ ചരിത്രത്തിലെ തന്നെ ഏറ്റവും ഉയർന്ന ഡി.എ നിരക്കായിരിക്കും ഇത്.
